*ඉස්සර නම් Bic කොම්පැනියට තිබුණේ නිල් පාට, රතු පාට, කළු පාට සහ කොළ පාට පෑන් නිපදවීමේ හැකියාව පමණයි. Bic කොම්පැණිය පටන් අරගෙනත් දැන් අවුරුදු හතළිහකටත් වැඩියි. පාට හතරක් එකින් එක මාරුවෙන් මාරුවට ලියන්න පුළුවන් පෑන් හදන්න විතරක් දැනන් හිටිය බුද්ධිමතුන් එතැනින් එහාට සෑහෙන පියවර ඉදිරියට ගිහින්. මිලියන දහසයක වර්ණ එකට සංකලනය වුණු අතිසංවේදී පෑනක් ලබන අවුරුද්දේ වෙළෙඳපොළට නිකුත් වෙනවා.
- "Cronzy” නමින් තමයි මිලියන දහසයක වර්ණ එකට එක්වුණු පෑන හැඳින්වෙන්නේ. මේ පෑන අතිසංවේදකයක්. පරිසරයේ තියෙන ඕනම පැහැයක් උරා ගැනීමේ හැකියාව මේ පෑන සතුයි. විසිහය හැවිරිදි Alex Leontes තමයි මේ පෑන නිර්මාණ සංකල්පයේ අයිතිකාරයා. වැඩේ කියන්නේ මේ පෑන වැඩ කරන්නේ ෆෝන් එකේ ඇප් එකක් එක්ක.ios, Android, windows ෆෝන් තියෙන අයට ලබන අවුරුද්දේ විතර මේ පෑනක් මිලදී ගන්න පුළුවන්. දැනට නම් මේ පෑනට මිල නියම වෙලා තියෙන්නේ ඩොලර් 300ක් විතර.
- මේ පෑනෙන් ලියන්න වගේම පාට කරන්නත් පුළුවන්. ඒ සඳහා වෙනම වෙන්වුණු පෑන් තුඩ කිහිපයක්ම තියෙනවා. Alex මේ පෑන හදන්න අවුරුද්දක් තිස්සේ මහන්සි වෙලා. Alexට ඕන වෙලා තිබුණේ එක වර්ණයක එළිය අඳුරු පැහැ පෙන්වන්න. අන්තිමේදී මිලියන 16ක් වර්ණ හඳුනගෙන ලියන්න පුළුවන් පෑනක් හදන්න Alex සමත් වෙලා. මේ පෑනේ එක කොටසක් ක්‍රියාකරන්නේ ස්කෑනර් යන්ත්‍රයක් ආකාරයෙන්. පරිසරයේ තියෙන වර්ණවලට සංවේදකයක් විදියට.
- පරිසරයෙන් සංවේදනය වෙන වර්ණ ඒ ආකාරයටම හරි එහෙමත් නැත්නම් තවත් වර්ණ කිහිපයක සංකලනයක් විදියටත් යොදාගන්න පුළුවන්. මේ හැම දෙයක්ම පාලනය වෙන්නේ දුරකතනයේ තියෙන ඇප් එක මඟින්. පරිසරයේ තියෙන වර්ණත් එක්ක තමන්ගේ නිර්මාණ කටයුතු සැලැසුම් කරන පුද්ගලයන්ට වගේම චිත්‍ර ශිල්පීන්ටත් මේ පෑන හොඳ උත්තරයක් වේවි කියලා Alex බලාපොරොත්තු වෙනවා. ඒත් හැබැයි ලබන අවුරුද්දේ මැයි වගේ වෙනකම් බලාගෙන ඉන්න වෙනවා.
No comments:
Post a Comment